Соработка на „Валентино“ и УНИЦЕФ за поттикнување на вакцинацијата против Ковид-19
Луксузниот моден бренд „Валентино“ и глобалната програма на УНИЦЕФ КОВАКС соработуваат за да ја промовираат иницијативата за вакцинација против ковид-19.
Идејата потекна од социјалните мрежи, а меѓу првите поддржувачи на оваа иницијатива беа дизајнерот Пјерпаоло Пичиоли, стилистката Зерина Акерс, Емануела Фарнети, поранешна уредничка на италијанскиот „Вог“, пејачката Лејди Гага и други.
Креативниот директор на „Валентино“, Пјерпаоло Пичиоли создаде нова лимитирана линија на дуксери со добропознатото лого „V“ но потпишани со фразата „Vaccinated“ – „Вакциниран“.
-Вакцинирањето е еден од најефективните начини да се избориме со оваа глобална пандемија, како и симбол за почит кон другите и социјалната обврска. Човек не може да се крие зад концептот на слобода со тоа што ќе се одлучи да не се вакцинира. – велат од „Валентино“.
Како заедничка соработка, дуксерот е достапен за продажба на сајтот на „Валентино“ по цена од 690 долари, а средствата ќе бидат донирани во програмата КОВАКС.
