Снеже до градоначалникот на Бутел: Те знаат ли од партија дека си кај мене во емисија?

Во најновото издание на емисијата на Снеже Велков, гости беа градоначалникот на општина Бутел, Дарко Костовски, психологот Тиана Ивановска, пејачката Мијата и инфлуенсерот Марио Арангеловски. Темата на разговорот беше како и кога треба да одговараме – дали попаметниот попушта, молчењето е злато или, сепак, е потребно да се одговори жестоко.

Дарко Костовски: Политиколог и политичар се како криминолог и криминалец

Градоначалникот Дарко Костовски беше пречекан со прашање од водителката: „Те знаат ли од партија дека си кај мене во емисија?“ Костовски, кој е и тренер на освојувачот на олимписки медал во теквондо, одговори со шега, истакнувајќи дека на првиот час на политичките студии научил дека „разликата меѓу политиколог и политичар е исто како разликата меѓу криминолог и криминалец“.

Тој дополнително го коментираше односот меѓу политиколозите и политичарите, истакнувајќи дека „политиколозите служат да прават евалуација на политичарите“, но дека тој го „хакнал системот“ и комбинирал две улоги во една.

На прашањето дали би дозволил некомпетентна личност да заземе позиција ако знае нешто што јавноста не го знае, Костовски изјави дека не би се мешал во судбините на другите.

Мијата: Жената треба да попушти за сексуалното здравје на мажот

Пејачката Мијата истакна дека во одредени ситуации е подобро да се молчи. „Ако ја видам девојката на другар со друг, ќе се направам дека не сум ја видела. Молчењето е злато,“ рече таа.

Во однос на тоа кој попушта во домашните односи, таа додаде: „Жената треба да попушти за да инвестира во сексуалното здравје на мажот.“

Психологот Ивановска: Ми се превртува желудникот од прашањето

Психологот Тиана Ивановска беше провоцирана со прашањето од водителката дали психолозите „продаваат магла“. Ивановска остро реагираше: „Ми се превртува желудникот од прашањето!“

Таа ја поддржа тезата дека „црните овци“ во семејствата се иноватори и носители на промени. „Тие поставуваат прашања и се обидуваат да го сменат текот на работите. Црните овци се лидери на промените и од нив не треба да се срамиме,“ истакна Ивановска.

Марио Арангеловски: Црна овца сум бил и ќе останам

Инфлуенсерот Марио Арангеловски се идентификуваше како „црна овца“, истакнувајќи дека токму тие луѓе се иноватори. „Црните овци се оние кои создаваат нешто ново. Дури и Никола Тесла бил окарактеризиран како црна овца,“ рече тој.