„Level Up Experience“ – Најголемото гејмерско доживување во Македонија

Овој викенд, во Дајмонд Мол во Скопје, се одржа „Level Up Experience“ – најголемото гејмерско доживување во Македонија, организирано од „Анхоч“ и онлајн медиумот „Комикс МК“. Настанот ги обедини гејмерите и фановите, кои успеаја да кренат уште еден левел!

Гејмерите ги тестираа своите вештини и знаења во натпревари од популарни игри како League of Legends, Street Fighter 6, Mario Kart 8, Brawl Stars и Pokemon Go. Дополнително, настанот беше збогатен со возбудливи активности и изненадувања за сите посетители.

Возбудливи моменти од настанот

Еден од најголемите атракции беше Косплеј натпреварот инспириран од серијата „Arcane“, кој го предводеше познатата косплеј артистка Ива Стојческа („Avi Cosplay“). Настанот беше придружен и со музичка атмосфера за која се погрижи DJ Bono, како и Ретро корнер кој ги врати посетителите во детството со легендарни игри како „Doom“, „PES“ и „Tekken 3“.

За љубителите на танцувањето, Shake It Off корнерот напојуван од JBL беше место каде што посетителите ги покажаа своите движења и освоија награди.

Главен водител на настанот беше харизматичниот Марко Новески, кој со својот хумор и енергија ги забавуваше сите присутни и додели бројни подароци обезбедени од врвни брендови како White Shark, Genesis, JBL, Samsung и други.

Натпревари и шампиони

• League of Legends: Турнирот кулминираше со финалето меѓу „Respawn Gaming“ и „Void E-Sports“. По жестока борба, титулата ја освои „Respawn Gaming“, додека третото место го освои тимот на „Asylum“.
• Street Fighter 6: Турнирот организиран од „RedFist Dojo“ привлече многу храбри „тепачи“ кои приредија незаборавни дуели.
• Brawl Stars: Турнирот, организиран од „Brawl Stars Македонија“, ги обедини мобилните гејмери во вистинска акција.
• Pokemon Go и Mario Kart 8 Deluxe: Организирани од „Пагода“, овие турнири беа хит кај фановите на мобилните и Nintendo игрите.

Организаторите „Анхоч“ и „Комикс МК“ најавија дека „Level Up Experience“ има потенцијал да прерасне во традиција, задоволувајќи ја сè поголемата потреба за вакви настани.

Level Up – Одиме на следниот левел!