Корисниците реагираат: Рекламите на YouTube сега траат со часови!

YouTube, популарната видео платформа, веќе подолг период е под лупа поради зголемениот број и должина на рекламите за корисниците кои не се претплатени на YouTube Premium. Последните случувања само ја зголемија фрустрацијата меѓу корисниците.

Некои од нив сведочат за реклами кои траат дури неколку часа и кои не можат да се прескокнат. На социјалните мрежи, особено на Reddit, се појавија објави од корисници кои прикажуваат реклами со екстремна должина – како на пример, реклама од речиси три часа за време на видео кое трае само 49 минути.

Иако во некои случаи е видливо копчето за „Прескокнување на реклами“, се претпоставува дека ваквите ситуации може да бидат поврзани со користење на блокатори на реклами, што ги прекршува правилата на платформата.

Од YouTube велат дека ваквите алатки за блокирање на реклами ги прекршуваат нивните услови за користење. Компанијата дополнително ги охрабрува корисниците или да дозволат реклами или да преминат на Premium услугата за непречено гледање.

Сепак, останува прашањето дали овие долги реклами се резултат на технички проблеми или на нова стратегија за зголемување на приходите од рекламирање. Корисниците очекуваат јасен одговор, додека платформата продолжува со тестирање нови начини за монетизација.