Четворица волонтери ќе престојуваат во куќата на NASA за симулирање на животот на Марс (ФОТО)

NASA претстави куќа во која четворица волонтери ќе престојуваат подолго од една година за да го симулираат животот на Марс.

Објектот, Mars Dune Alpha, е изработен со технологијата на 3D печатење и се наоѓа во истражувачката установа на Американската вселенска агенција во Хјустон во Тексас. Четворицата волонтери ќе помогнат во подготовката на идната мисија на Црвената планета со мерење на нивните перформанси и когнитивни способности, за да се разберат потребните ресурси за ова амбициозно патување.

Објектот има површина од 160 метри квадратни, две бањи, вертикална фарма за одгледување на салати, соба за медицинска грижа, простор за опуштање, неколку работни станици, воздушна комора со реконструкција на околината на Марс и лента за трчање.

Научниците ќе ги тестираат реакциите на екипажот на стресни ситуации, вклучувајќи ограничен пристап до вода или дефекти на опремата. Ова е една од технологиите кои NASA ги проучува за потенцијална изградба на живеалишта на други планетарни или лунарни површини, а најголемиот фокус сега е на претстојните мисии Artemis, чија цел е луѓето да се вратат на Месечината за прв пат после половина век.