МНТ и Националниот театар на Унгарија потпишаа меморандум за соработка

Директорот на Македонскиот народен театар, Никола Кимовски, и режисерот Дејан Пројковски престојуваат во официјална посета на Будимпешта, каде беше потпишан меморандум за соработка со Националниот театар на Унгарија (Nemzeti Színház), еден од најзначајните театри во Европа.

Со овој договор, МНТ и Националниот театар на Унгарија стануваат партнери, со што се отвораат можности за размена на претстави, уметници и идеи, како и заедничка реализација на театарски проекти.

Соработката предвидува заеднички настапи, размена на уметнички тимови и учество на фестивали, со цел да се збогати театарскиот живот во двете земји. Посебен акцент е ставен на поддршката на младите театарски уметници.

Според директорот Никола Кимовски, веќе се договорени гостувања на МНТ во Будимпешта, како и настап на Националниот театар на Унгарија во Скопје. Во рамки на јубилејот „80 години МНТ“, во Скопје ќе гостува директорот на Националниот театар, Атила Видњански, заедно со негови најблиски соработници.