Отворен е повикот за учество на 8.Фестивал на млади „Џифони Македонија 2020“

Филмскиот фестивал за млади „Џифони Македонија“ го објави повикот со кој ги повикува сите ученици од средните и од основните училишта да се пријават за учество на осмото издание на филмскиот фестивал за млади, кое ќе се одржи онлајн од 25 до 30 септември.

Темата на „Џифони Македонија 2020“ е „Земја“ (Earth) како дел од тригодишниот циклус посветен на животната средина (2018 – Вода, 2019 – Воздух), кој се совпаѓа со педесетгодишнината од основањето на матичниот фестивал „Џифони Експириенс“ во Италија.

Осмото издание на „Џифони Македонија“ ќе се одвива од 25 до 30 септември и предвидува богата програма. Дел од филмските проекции ќе бидат организирани во соодветно адаптирани кино сали на отворено, со ограничен број на седишта, во согласност со протоколите за безбедност.

Најголемиот дел од активностите предвидени за младите учесници ќе бидат емитувани онлајн, со директно вклучување во дискусиите, работилниците и другите онлајн настани.

За таа цел ќе започне со работа новата младинска дигитална платформа, на која ќе се презентира богатата понуда на филмови и други содржините на овогодинешниот фестивал и ќе им се овозможи на учесниците директно да се вклучуваат во работилниците и другите онлајн евенти и да имаат интерактивни средби со гостите. На тој начин „Џифони Македонија“ продолжува со традиционалната филмска програма, активности и дружба, притоа водејќи сметка за безбедноста на учесниците, во целосна согласност со препораките за заштита и превенција на Ковид-19.

По завршувањето на фестивалот, платформата ќе им биде наменета на младите, за објавување на нивни творби од аудиовизуелните уметности, како и за други содржини наменети на младите љубители на филмот.

Оваа година меѓународното жири ќе биде составено од над 300 ученици од основните и средните училишта од Македонија и од десетина странски држави, кои фестивалот ќе го следат онлајн, со директни вклучувања во дискусии, работилници, мастеркласови и други интересни содржини.

Повикот за учество е објавен на веб-страницата на „Џифони Македонија“ (https://giffoni.mk/?p=3102) и на социјалните мрежи.

Фестивалот „Џифони Македонија“ е поддржан од македонската Агенција за филм и Министерството за култура, Град Скопје и партнерот од Италија – „Џифони Експиериенс“. Дигиталната младинска платформа на која ќе се одржува онлајн-изданието на фестивалот е развиена со поддршка на Мисијата на ОБСЕ во Скопје.