„Ќе настапувам од дома“: Ед Ширан позитивен на коронавирус
Само неколку дена пред објавувањето на неговиот нов студиски албум, Ед Ширан на својот профил на Инстаграм објави дека е позитивен на Ковид-19.
Британската поп ѕвезда објави дека ги почитува владините препораки и дека се наоѓа во самоизолација, но дека ќе продолжи да настапува и да дава интервјуа од својот дом во Сафок.
Во престојниот период тој имаше закажано многубројни појавувања во јавноста како дел од промоцијата за новиот албум. Тој беше најавен и како музички гостин на популарното американско шоу „Saturday Night Live“
-Сакам да ве известам дека, за жал, се тестирав позитивно за ковид-19, така што сега сум самоизолиран и ги следам владините насоки. Тоа значи дека сега сум оневозможен да извршувам било какви обврски лично, така што моите планирани интервјуа/настапи колку што можам повеќе ќе ги правам од мојата куќа. Се извинувам на секој што сум го изневерил. Бидете безбедни сите – вели музичарот во објавата.
30-годишниот добитник на 4 греми награди, претходната недела настапи на доделувањето на наградите „Earthshot“, церемонија организирана од страна на принцот Вилијам.
Новиот албум на Ед Ширан насловен „=“ треба да биде објавен на 29. октомври.
