„Современа македонска фотографија“ – монографија што го обележува 80-годишниот развој на фотографската уметност во Македонија

Монографијата „Современа македонска фотографија – Македонска фотографија 1945-2020“ претставува единствено и капитално издание, кое нуди детален увид во историскиот и креативниот развој на фотографската уметност во Македонија.

Финансирана како Проект од национален интерес од Министерството за култура и спонзорирана од „Халк Банка“ – Скопје, монографијата претставува пресек на речиси 80-годишно творештво на автори-членови на Фото сојуз на Македонија.

Голема промоција и ексклузивна изложба

Промоцијата на монографијата ќе се одржи на 30 јануари, во 20 часот, во Културно-информативниот центар во Скопје.

Настанот ќе биде збогатен со изложба на автентични дела од Архивата на Фото сојуз на Македонија, кои за првпат ќе бидат претставени пред пошироката јавност.

Импресивен список на фотографски великани

Во монографијата и изложбата се застапени некои од најзначајните македонски фотографи, меѓу кои:
Цветко Иванов, Благоја Дрнков, Кирил Билбиловски, Лазо Величковски, Ѓорѓи Гога Попов, Живко Јаневски, Благоја Бањански, Александар Цветиновски, Ацо Кондев, Владо и Лазо Плавевски, Билјана Јуруковски, Владимир Тодоров, Боро Рудиќ, Цветан Гавровски, Душан Доцевски, Валентин Малинов, Раде Луковиќ, Драги Неделчевски, како и новата генерација македонски фотоавтори.