Сцена
Новинарка мораше да се извини откако го прекина интервјуто со Babyface на црвениот тепих на Греми
Водителите кои беа на црвениот тепих на доделувањето на Греми наградите се најдоа во центарот на вниманието поради начинот на кој се однесуваа кон музичарот и продуцент Babyface.
Новинарките на Асошиетед прес, Криста Фаурија и Лесли Амбриз разговараа со 65-годишниот Кенет Брајан Едмондс, познат како Babyface, кој има освоено 13 Греми и напиша и продуцираше повеќе од 26 број еден R&B хитови и е на листата меѓу 50-те најдобри музички продуценти на сите времиња.
Меѓутоа, додека разговараа со него, вниманието им го привлече уште една ѕвезда. Новинарката Криста Фаурија ја забележа пејачката Чапел Роан и почна да ја довикува среде интервјуто со Babyface, а тој се повлече и се откажа од своето место, велејќи им да одат да го направат интервјуто.
Овој потег на новинарката предизвика остра осуда кај бројните гледачи, а видеото стана вирално на социјалните мрежи. Клои Кардашијан, ѕвездата на Keeping Up With the Kardashians, напиша: „Ова е такво непочитување кон Babyface во ова интервју. Babyface имаше толку значајно влијание врз музичката индустрија, на толку многу начини. Лудо е да се види легенда која не ја добива почитта и вниманието што го заслужува. Тој е пионер и заслужува многу подобро од ова“.
Со неа се согласија и бројни други кои напишаа дека новинарите биле „целосно груби и непрофесионални“. По бројните негативни реакции, Фаурија се извини во живо на доделувањето на наградите.
„Сакав да кажам дека навистина ми е жал што предмалку го прекинав Babyface. Влезе Чапел Роан и имаше голема гужва, како што е вообичаено. Но, јас сум голем обожавател на Babyface, како и сите ние, па затоа јас само сакав да кажам дека навистина „се извинувам“, рече таа.
