Објавен е трејлерот за третата сезона на серијата „The White Lotus“

Премиерата на третата сезона на популарната серија на HBO е закажана за 16 февруари 2025 година.

Серијата на Мајк Вајт, која ги воодушеви гледачите ширум светот, е позната по сатиричното прикажување на општествените класи и длабоките конфликти што се случуваат зад фасадата на луксузните одморалишта. Овој пат, приказната е сместена во прекрасното и егзотично опкружување на Тајланд. Таму новите гости и вработени во одморалиштето ќе откријат скриени страсти, несигурности и конфликти во период од седум дена.

Актерската екипа оваа сезона ја предводат Лесли Биб, Кери Кун, Волтон Гогинс, Сара Кетрин Хук, Џејсон Ајзакс, Лалиса Манобал, Мишел Монаган. Исто така, Сем Нивола, Лек Патаравади, Паркер Пози, Наташа Ротвел, Патрик Шварценегер, Тејме Таптимтонг и Ејме Лу Вуд. Покрај нив, во серијата се појавуваат и Николас Дувернеј, Арнас Федаравичиус, Кристијан Фридел, Скот Глен, Дом Хетракул, Џулијан Костов, Шарлот Ле Бон, Моргана О’Рајли и Шалин Перис.

Серијата веќе постави високи стандарди со своите претходни сезони. Првата сезона, сместена на Хаваи, беше премиерно прикажана во 2021 година и освои дури десет Еми награди, вклучувајќи ја и наградата за најдобра кратка или антологиска серија. Втората сезона, која е сместена на Сицилија, донесе уште поголем број номинации, вкупно 23, вклучително и номинација за најдобра драмска серија, со пет освоени награди.