МК Сцена
ПУБЛИКАТА НА НОЗЕ: Јан Гилан ги оживеа хитовите на „Дип Прпл“ (ФОТОГАЛЕРИЈА)
Од стари до млади, сите уживаа на спектакуларниот концерт на Јан Гилан синоќа во ВИП арената „Борис Трајковски“ во Скопје.
Во преполната арена во која се бараше место повеќе буквално целата публика беше на нозе, играјќи на старите, но и нови хитови на легендарниот Јан Гилан.
Низ столчињата во партерот и на трибините можеше да се забележат мали деца, но и постари љубители на класичниот рок.
Концертот започна точно во 21 часот со настапот на групата „Папа ле Гал“ во која пее и ќерката на Гилан, Грејс.
По одличното загревање на публиката, сцената се подготвуваше за Македонската филхармонија и бендот на Дон Ари кои го придружуваа Јан во текот на вечерта.
Се редеа хитовите „Perfect Strangers“, „When A Blind Man Cries“, Strange kind of woman“ и многу други, а кулминацијата на атмосферата настана кога публиката ги слушна историските акорди на „Smoke On The Water“.
За неверојатното аудио уживање беше задолжен 40-члениот оркестар на Македонската филхармонија, под диригентска палка на британецот Стивен Бентли Клеин, кој ги направи новите аранжмани на песните.
Во продолжение погледнете ја галеријата низ објективот на нашиот фоторепортер Атанас Стојановски.
