Принцот Хари ја повлече тужбата за клевета против британски таблоид

Британскиот принц Хари ја повлече тужбата за клевета против весникот „Мејл он Сандеј“ поради напис за неговото лично обезбедување, објави „Дејли мејл“.

Минатата година, помладиот син на кралот Чарлс го тужеше издавачот Associated Newspapers поради напис од 2022 година, во кој се тврди дека се обидел да го задржи во тајност правниот спор со британската влада за полициската заштита што заврши откако тој се повлече од кралските должности во 2020 година. Во написот Хари се обвинува дека се обидел да ја излаже јавноста велејќи дека е спремен сам да плаќа за своето обезбедување.

Во декември тој побара од судот да не ја разгледува одбраната на весникот, но судијата заклучи дека има шанси да успее. Во резимето на одлуката на судот, тогаш пишуваше дека „тужбата на војводата од Сасекс ќе помине низ другите фази на предистражната постапка, како и судењето во 2024 година“. Ова значи дека тој веројатно ќе мора да сведочи пред Високиот суд во Лондон подоцна во 2024 година.

Високиот суд во Лондон пресуди дека извештајот на Мејл е клеветнички, што му го отвори патот на Хари да покрене случај против еден од најголемите британски издавачи на медиуми, но обидот да се реши случајот во негова корист без судење пропадна.

Дејли Мејл објави дека војводата од Сасекс ја повлекол тужбата неколку часа пред неговите адвокати да ги предадат соодветните документи. Британските медиуми исто така објавија дека Хари сега ќе мора да ги плати сите трошоци за весникот, кои изнесуваат околу 250.000 фунти, како и сите други трошоци, кои се проценуваат на вкупно 500.000 фунти.

Адвокатот на Хари и портпаролот на Associated Newspapers одбија да го коментираат случајот. Станува збор за еден од низата судски случаи што ги покрена кралското семејство против британските таблоиди. Тој и уште шест лица, меѓу кои и пејачот Елтон Џон, ги тужат новинарите на Associated.