„Диџеј Ахмет“ со светска премиера на Санденс: „Холивуд Рипортер“ го пофали дебитантскиот филм на Георги Унковски

Дебитантскиот филм на режисерот Георги Унковски, „Диџеј Ахмет“, синоќа го имаше својот голем момент на Санденс фестивалот во Парк Сити, Јута. Филмот, кој се натпреварува за награди во програмата Светски филм, доби позитивни критики и привлекува внимание со својата уникатна и емоционално наполнета приказна.

„Елегантен и привлечен“, „Инспиративна приказна за созревањето…“, се дел од впечатоците на „Холивуд Рипортер“, кој ја пофали длабоката поврзаност на филмот со локалната култура и истовремено го истакна неговото универзално значење. Критиката ја започнува со паралела со познатиот филм „Безгрижен“ (Footloose), опишувајќи ја атмосферата на „Диџеј Ахмет“ како спој на традицијата и бунтот.

„Диџеј Ахмет“ е драма со примеси на комедија која го следи животот на Ахмет, 15-годишно момче од мало село во Источна Македонија. Ахмет се соочува со конфликтите меѓу желбата да стане диџеј и стегите на семејството и заедницата. Музиката му е единствениот излез, но првото искуство со љубовта и очекувањата на таткото му се големи пречки.

Во рецензијата се нагласува дека режисерот Георги Унковски успеал да создаде искрени, натуралистички изведби, со посебно внимание на Ариф Јакуп, кој ја носи главната улога на Ахмет. Наум Доксевски, кинематограферот на филмот, го создава визуелниот идентитет на филмот со топли златни тонови, што го оддалечува од мракот кој често се поврзува со балканските уметнички филмови.

Критиката исто така додава дека Јакуп, како симпатичен новајлија, успешно го пренесува бунтовничкиот дух на својот лик, иако Ахмет не станува вистински диџеј. Наместо тоа, тој го одржува ритамот на своето животно патување, создавајќи емотивна поврзаност со публиката.

„Диџеј Ахмет“ не само што ја доби поддршката на филмската индустрија, туку и позитивни рецензии од голем број филмски портали, како што се „Скринанархи“ и „Скриндејли“, кои го пофалија како паметно деби кое го освежува жанрот на тинејџерските романи и ја прикажува македонската култура на нов и интересен начин.

Филмот беше сниман во октомври и ноември 2024 година во селата Коџалија и Али Коч во Радовиш, како и во Скопје. Во главните улоги се Ариф Јакуп, Дора Акан, Наим Агушев и Аксел Мехмед, а филмот е резултат на копродукција помеѓу Македонија, Чешка и Србија.

Поддржан од Агенцијата за филм на Република Македонија и европскиот фонд Еуримаж, „Диџеј Ахмет“ се наоѓа на почетокот на својот пат кон меѓународната сцена, со големи очекувања од критичарите и публиката. Ова е втор пат режисерот Унковски да учествува на Санденс, по неговиот успешен краток филм „Налепница“ во 2020 година.