Сцена
Жилиет Бинош ќе претседава со жирито на 78. Кански филмски фестивал
Канскиот филмски фестивал избра едно од најпознатите ликови на француската кинематографија во светот, актерката Жилиет Бинош, за претседател на жирито на 78-то издание на фестивалот, што ќе се одржи од 13 до 24 мај. 60-годишната актерка ја наследува режисерката на Барби, Грета Гервиг, која претседаваше минатата година. Таа ја додели Златната палма на американскиот филм „Анора“ на Шон Бејкер.
„По втор пат во историјата на фестивалот, двe уметници ќе го разменат овој престижен факел на претседателството на жирито“, се вели во соопштението на организаторите. Ова претходно се случи во 1960-тите, кога иконата на италијанската кинематографија Софија Лорен ја презеде функцијата од Оливија де Хавиленд.
Шест децении подоцна, најголемиот светски кинематографски настан ја избра Жилиет Бинош како една од меѓународно најпознатите француски ѕвезди, ценета и од публиката и од критичарите.
Таа е една од ретките што освоила тројна награда: наградена е во Кан за „Copie conforme“ од Иранецот Абас Кјаростами, потоа на филмскиот фестивал во Венеција, како и на Берлинале. Таа е исто така една од ретките Французинки што добиле Оскар, во 1997 година, за најдобра споредна женска улога, за филмот„ The English Patient“.
„Со нетрпение очекувам да ги споделам овие моменти од мојот живот со членовите на жирито и со јавноста. Во 1985 година првпат ги искачив скалите со ентузијазам и неизвесност на една млада актерка. Никогаш не ни замислував дека 40 години подоцна ќе се вратам со оваа почесна улога како претседател на жирито. Сè уште мислам на привилегијата, одговорноста и апсолутната потреба од понизност за оваа улога“, изјави глумицата која е редовен гостин на Канскиот фестивал.
