Михаела Лазаровска урна 14 години стар рекорд во скок во височина
Викендов во Скопје се одржа атлетскиот младински Куп на Македонија. Падна еден рекорд, истиот го постави Михаела Лазаровска од АК Центар.
На Арената „Тодор Проески“ во Скопје овој викенд се одржа атлетскиот младински Куп на Македонија. Дводневната програма беше исполента со 16 дисциплини, учество земаа по девет тима во машка и во женска конкуренција.
Во центарот на вниманието се најде Михаела Лазаровска. Членот на АК Центар урна рекорд стар 14 години. Во дисциплината скок во височина, таа го надмина остварувањето на Сања Илиева АК Кавадарци.
Лазаровска прескокна 167 сантиметри, еден повеќе од Илиева во 2007 година, и стана нова рекордерка во дисциплината скок во височина кај дамите во младинска категорија.
Севкупен победник на младинскиот Куп на Македонија е АК Работнички со 75 бодови, голем дел од нив или вкупно 59 овој клуб ги освои во машка конкуренција. На второто место на севкупниот пласман се најде АК Центар со 60 бода, зад него е АК Делта со седум бода помалку, по што следуваат АК Куманово, АК 7-ми Мај, АК Лириа, АК Дрини Старт, АК Олимп и АК Охрид.
Работнички доминираше во машка конкуренција, со 59 бода, додека во женска конкуренција убедливо најдобар беше АК Центар со 60 бода.
Сликата од Арената „Тодор Проески“ беше прекрасна, на едно место продефилираа голем број на идни македонски атлетски ѕвезди, а Купот на Македонија се одигра согласно со насоките на надлежните институции во време на Ковид-19.
Атлетската федерација на Македонија на сите учесници им честита за остварените резултати.
