СЈО покрена 17 обвиненија против 94 физички и 7 правни лица

Специјалното јавно обвинителство денеска на прес-конференција соопшти дека подигнало 17 обвиненија за 18 предмети против 94 физички и седум правни лица.

Специјалната јавна обвинителка Катица Јанева истакна дека се обезбедени цврсти и обемни докази за злоупотреби на службена положба, кршење на закони за јавни набавки и други кривични дела. Јанева рече дека е уверена оти пред судовите ќе докажат дека сите осомничени од СЈО се одговорни за делата.

За случајот „Талир“ за незаконско финансирање на партијата ВМРО-ДПМНЕ, Јанева истакна дека нема обвинение, но истрагата ќе продолжи. Посочи дека временските рокови не биле доволни за СЈО да ја заврши истрагата за овој случај. Обвинение не е поднесено и за предметот „Табла“, а два предмета „Таргет“ и „Тврдина“ се споени во еден.

Специјалното јавно обвинителство досега подигна три обвиненија и тоа за случаите за незаконско уништување на документација од системите на прислушување, за нарачаното насилство во општина Центар, и за случајот „Транспортер“ во кој осомничен е битолскиот градоначалник Владимир Талески.

За сите други случаи за кои беше отворена истрага во изминатите 18 месеци од функционирањето на СЈО ќе биде поднесено обвинение. Сите досегашни случаи на СЈО започнуваа на буквата „Т“: „Титаник“ , „Таргет“, „Тврдина“, ,„Тенк“, „ТНТ“, „Траекторија“, „Трезор“, „Тортура“, „Тендери“, „Тарифа“, „Труст“, „Табла“, „Триста“, „Тотал“, „Тифани“, „Топлик“, „Тревник“…

Новите обвиненија за случаите за кои беше отворена истрага СЈО ги покренува на еден ден пред истекот на законскиот рок за поднесување обвиненија.